Gwefan llywodraeth y DU

Gwneud penderfyniad

Bydd y Gwasanaethau Meddygol yn anfon yr adroddiad at y person yn y Gwasanaeth Anabledd a Gofalwyr sy'n gyfrifol am benderfynu am eich hawliad. Mae’r Gwasanaeth Anabledd a Gofalwyr yn rhan o'r Adran Gwaith a Phensiynau.

Bydd y penderfynwr yn ystyried yr adroddiad ochr yn ochr â'r holl wybodaeth arall a ddarparwyd ar gyfer eich hawliad ac yn penderfynu a ddylid cymeradwyo'ch cais a faint o Lwfans Byw i’r Anabl y gallech ei gael.

Cewch lythyr yn nodi eu penderfyniad.

Cyfrinachedd

Mae'r holl wybodaeth feddygol sy'n berthnasol i'ch cais, gan gynnwys adroddiad y meddyg ar sail yr archwiliad meddygol, yn gyfrinachol ac ni chaiff ei rhyddhau i neb y tu allan i'r Adran Gwaith a Phensiynau.

Weithiau mae'n bosib y bydd y meddyg am anfon rhywfaint o wybodaeth am eich archwiliad meddygol at eich meddyg teulu. Dan yr amgylchiadau hynny, bydd y Gwasanaethau Meddygol yn ysgrifennu atoch ac yn gofyn a ydych chi'n fodlon iddynt roi'r wybodaeth i'ch meddyg teulu.

Ni fyddant yn rhannu’r wybodaeth gyda’ch meddyg os nad ydych yn dymuno.

Pryd gewch chi wybod am y penderfyniad ynghylch eich budd-dal

Fel arfer, bydd angen oddeutu 40 diwrnod gwaith i brosesu cais am Lwfans Byw i'r Anabl, o'r diwrnod y bydd yr Adran Gwaith a Phensiynau'n derbyn eich ffurflen gais. Gallwch holi sut mae'ch cais yn dod yn ei flaen drwy alw'r llinell gymorth Anabledd.

Rhif ffôn: 08457 123456

Ffôn testun: 08457 224433

Mae'r llinellau ar agor rhwng 7.30 am a 6.30 pm o ddydd Llun i ddydd Gwener.

E-bost: DCPU.Customer-Services@dwp.gsi.gov.uk

Os nad ydych chi'n hapus â'r archwiliad meddygol

Os nad ydych chi'n hapus â'r ffordd y cafodd yr archwiliad meddygol ei gynnal, gallwch gwyno wrth y Gwasanaethau Meddygol. Esbonnir y drefn gwyno yn y llythyr gawsoch chi am eich archwiliad meddygol. Cewch gwyno hefyd wrth y meddyg adeg yr archwiliad. Os na allan nhw ddatrys y broblem, byddan nhw'n rhoi taflen i chi'n esbonio'r drefn gwyno ffurfiol.

Gallwch hefyd gysylltu â'r llinell gymorth Anabledd i ofyn am gyngor am sut i gwyno wrth y Gwasanaethau Meddygol.

Os ydych chi'n anghytuno â'r penderfyniad am eich budd-dal

Os ydych chi'n meddwl bod y penderfyniad am eich cais am fudd-dal yn anghywir, neu os ydych chi'n anghytuno â faint o fudd-dal a roddwyd i chi, gallwch:

• gofyn i'r swyddfa a wnaeth y penderfyniad ei esbonio
• gofyn am gael ailystyried y penderfyniad gan rywun arall
• apelio yn erbyn y penderfyniad i dribiwnlys annibynnol

• Sut i apelio yn erbyn penderfyniad ynghylch budd-daliadau (adran arian, treth a budd-daliadau - cyffredinol)

Adroddiad y meddyg

Cewch ofyn am gael copi o adroddiad y meddyg unrhyw bryd.

Os byddwch chi'n apelio yn erbyn y penderfyniad am eich budd-dal, byddwch yn gallu gweld adroddiad y meddyg fel rhan o'r broses apelio.

Archwiliadau meddygol pellach

Bydd y Lwfans Byw i'r Anabl a roddir i chi naill ai am gyfnod penodol neu am gyfnod amhenodol. Bydd y penderfynwr yn pennu cyfnod eich lwfans gan ystyried ai anabledd neu salwch parhaol sydd gennych ynteu a fydd eich anghenion o bosib yn newid.

Os am gyfnod penodol y rhoddir eich lwfans i chi, fe'ch gwahoddir i wneud cais newydd cyn i'r lwfans ddod i ben. Gelwir hyn yn ‘gais adnewyddu’. Prosesir ceisiadau adnewyddu yn yr un ffordd yn union â hawliadau newydd, felly, mae'n bosib y gofynnir i chi gael archwiliad meddygol eto.

Os am gyfnod amhenodol y rhoddwyd y budd-dal i chi, gan amlaf, ni fydd yn rhaid i chi wneud cais adnewyddu. Weithiau, gellir adolygu dyfarniadau amhenodol, ac fe all fod yn rhaid i chi gael archwiliad meddygol arall fel rhan o'r adolygiad.